AI ANSAH 1
Nya alai tu meh ke digela aku ai sempuli padi nubai,
Tumbuh di tanah latah mandai,
Dibantun dara imun nyerumba kelemayang panas lemai,
Diketau dara bagau betenggauka seliau bintang tigai,
Dikisar indai entukar bebar enggau kah lamba mikai,
Ditutuk dara gauk enggau lesung tunggul kelampai,
Ditampi dara tinggi enggau chapan baru tembu bingkai.
Lepas nya baru dipanduk dara gauk enggau periuk temaga Berunai,
Dichampur indai burung tekukur enggau meki ragi pemakai,
Disimpan indai burung bayan dalam tempayan dua berimbai,
Disengkabung indai burung tiung enggau lumpung kudi Berunai,
Udah nya baru lalu dituang indai bujang ngagai balang butul kirai.
Dia iya lalu bebali nyadi tuak ansah beram nyamai,
Enti kelia dikena ngansah niang Minggat apai Runai seduai Awan apai Sawai,
Tang ke tu kena aku ngansah tatah dabung landai nuan Igat wai,
Ngambika ati nuan berani ngereja semua utai,
Awakka runding nuan juring baka juing laja kirai,
Sada nuan bisa ari tuba Kayan Makinai,
Ngambika mejang nuan ila tau enggau orang ngerandang jalai singkang pemansang ngemajuka bansa kitai.
Penerang: Ai ansah tu dikena muji/ meransang/ ngelangkung orang ti deka bejaku awakka orang ti deka bejaku nya tau berani bejaku, enda kesal, enda kabat sereta enda malu dipeda orang.
AI ANSAH 2
- DIKENA NGASUH ORANG BEJAKU NGENA SEMPAMA
Tu ai buah padi mudah,
Baka tangkai jelai merundai,
Nya alai tu ai ansah,
Ukai baka ke ngansah beliung bisi peredah,
Ngansah rantung besi patah.
Ai sempuli padi mudah tu,
Disuaka aku enggau tapa tunjuk tengah,
Dikena aku nyiram geman dabung tatah,
Enggi nuan punggal,
Dikena aku ngasuh nuan bejaku ngena entelah,
Kedua ngena sempama,
Laban nuan endang udah dipaduka kitai serumah,
Nampung bungah jaku tuai.
( Ai ansah tu dikena ngasuh orang ke bejaku nya bejaku ngena jaku karung)
AI ANSAH 3 -
DIKENA NGANGKATKA ORANG BEJAKU
Tu ai serabat pakau kawat,
Baka jelap daun api,
Ai buah tu anggur mirah,
Ke terubah nyadi berandi,
Ukai enda diturun ari bilun kapal besi,
Nyerumba sebun ambun pagi,
Terengkah disebelah padang kerembai bekuang tikai peradani,
Lalu ditepanka ba langkan bas mini,
Sereta sangkai tanah seberai Saratok lelanji,
Lalu simpan kedalam kedai Chuan seduai Taukey Ah Tee,
Nya alai ke lemai tu punggal,
Tak merenchit tu mimit ari burit jebul besegi,
Ngeluah di kelasah tikai peradani,
Dikena aku ngansah tatah dabung gigi enggi nuan,
Ngambika nekis nyaris inggar bemunyi,
Disemaka ngagai panjung niang Munan apai Umi,
Lebuh tinda iya ke ngetanka kuta Sadok lelinang.(
Ai ansah tu dikena meransang orang ke deka diasuh bejaku)
AI ANSAH 4
Ai tusu tu kenu ko aku beri Antu Bunsu Petara
Ai telujuh telusur peluh selangka dada
Besimbak ai tu ari Perak senentang awak Singapura
Tak rigang-rigang ai tu nepan luan bilun tambang terengkah di padang bilun Kuching rinda
Dia Gasan ke peresa kastam bala jaga
Dia Jamat kena tangkap Tuan Sup.meruan surat tumbuk angka
Lalu dijual bala sedagar serata menua
Nya alai ai tu beli bujang mereti enggu perinchit ringgit wang bunga
Bai iya pulai ke penyurai rumah raya
Taruh di penaik bilik buka dua
Tang ke lemai tu lejah-lejah nengah kelasah tikai sana jawa
Udah lepas aku ari gelas changkir bebunga
Terima nuan enggau tapa tunjuk dua
Katup nuan enggau mulut dabung seleka
Awakka nyawa nuan nekis nyaris inggar kela-kela
Awakka nuan nusui berita, dinga semua bala, ke semuka tekang pengabang.
( Ai ansah ti dikena meransang tauka muji orang ti deka bejaku awakka iya enda kesal tauka takut.)
AI ANSAH 5
Tu ai dan berangan ujan ke terensam lentur nunggang,
ai pating limau nungging ke bepeling mua lubang.
Tu ga digaga Endu Dara Ngantadi pala dulang tapang,
disimpan dara ganggam di pelawan tajau besuran,
lalu digagaka chap pakau kawat tak melabat sain pedang,
lalu ditanchang dara mekang nengah gelenggang gumbang
besimpan nepan diluan bilun engkabang.
Lalu ngasing mengeri Kuching mansa pasar Simanggang,
masuk pasar Saratok lalu tama kedai Boo Ang,
mudik nanga Awik naka pechik Lubok Kepayang,
lalu empulak Nanga Seblak naka sitak Nanga Brayang.
