BIAU PENGAROH
Sa, dua, tiga, empat, lima, enam, tujoh...
Enda aku busong laya pambu megai langgai manok kelabu,
Miau pengaroh maioh betugong ditu,
Laban kaki aku bediri di segi bari buku,
Ngeli ngetup badi mata duku,
Pala ditata lala minyak ambu,
Belakang ditinggang seludang baju kabu.
Aku tu ga nitih ka adat nampong jako,
Enggi aki kitai Apai Migu,
Ke dulu meri tau bebasa ka pangan,
Agi ga aku beterabai ka iko manok kelabu,
Ke merundu nipas menalan.
Enda aku busong laya sulai megai manok ijau enseluai,
Miau ubat serangkap genap pengaroh tuai,
Laban kaki aku berindik di segi batu chanai,
Ngeli ngetup badi besi makai,
Pala ditata lala minyak pugai,
Belakang ditinggang seludang baju kirai.
Agi ga aku niti adat nampong jako sida ke tuai,
Ke udah nadai lama jeman,
Aku ga beterabai ka langgai panjai manok ijau enseluai,
Ke merundai balat ensebam.
Enda aku busong laya tumpat megai langgai manok kepiat,
Miau pengaroh gembar tuboh ubat serangkap genap,
Laban kaki aku berindik di segi bari umat,
Ngeli nanyi ngetup badi besi ngarat,
Pala ditata lala minyak penyelap,
Belakang ditinggang seludang baju kebat.
Agi ga aku nitih ka jako nampong adat,
Aki tuai Surong Kempat ke berarat muting jematan,
Aku ga beterabai ka sayap manok kepiat,
Ke betisap geran pepisan.
Oh nama deh pemusong nama deh pengelunggong,
Laban endang baka semeriong tampong rutan,
Oh nama deh penulah nama deh pengerebah,
Laban endang nitih gerah selama jeman,
Oh nama deh pemati nama deh pengelesi,
Laban endang nali adat Iban.
Kepai-kepai penchingan tunjok tigai,
Megai manok ijau enseluai,
Sereta nyawa dabong landai ba moa kita ke semuka dudok berintai,
Ngelingi talam pinggai besai,
Alai pengaroh ubat tuai.
Nya alai tu endang nunda biau Pungga seduai Ngelai,
Leboh seduai ke miau pengaroh ubat tuai,
Dikena seduai ngalah ka Raja Ribai,
Diau di tasik besai alun gagai gigi gemuan.
Kapa-kapa penchingan tunjok dua,
Megai langgai manok banda sereta suara nyawa,
Ba moa kita ke semumok dudok semuka,
Mangkang talam berimbai dua,
Alai ubat serangkap genap pengaroh maioh bansa.
Ya alai tu endang nunda biau Keling seduai Laja,
Leboh seduai ke miau leka balang begeman.
Nya alai penchingan tunjok ujong,
Enggi aku megai langgai manok sabong,
Ba moa kita ke semuka dudok betugong,
Nunga talam sukut lapan jalong jebong.
Tu ga endang nitih ka ajar nampong-menampong,
Ari aki kitai Singalang Burong,
Ke ngembuan puchong mali rampong,
Ngasoh betampong bisi mudan.
Selanjau ijau manok tawai tu,
Nasit nyelit dua berintai,
Iko merundu nipas tikai,
Tu ga dikena aku masa sida ke lama udah laya ilang nadai,
Ke bisi ngembuan ubat pengaroh tuai ke berintai maioh macham.
Udah iya dibiau aku enggau selanjau manok banda,
Iko merundu bedada nyala,
Rekong tuntong betada bisa,
Dia deh taring uting babi menoa,
Keba pun disakum peterum perigu batu bepanga tiga,
Enda anchi pemisa-misa,
Bisa ari raka tubai tanam.
Keba tu diberi adi Simpandai Dara,
Surong Lulong bini Laja,
Keba pati kiba iya suba diempu Aji Apai Limpa,
Nya ke ngasoh iya berani enda jena-jena,
Tang iya ke lesi bebadi ilang lela,
Laban randa perasa nan datas kerangan.
Udah iya dibiau enggau selanjau ijau manok tawai,
Dia deh keruntok tandok rusa mulai,
Ujong nyengkong kilas nyuntai,
Nyadi naka pemisa utai,
Bisa ari raka randau tubai tanam Jambai siti emperan.
Tu ga sua Bunsu Kamba,
Diberi Lenta Dara Jawai,
Keba panga ujong iya menya,
Dikembuan niang Rentap Apai Tambong,
Nya orang ke berani ati mutus kepong,
Nan di tuchong Sadok rerenjong,
Tiga kali bala Rajah besurong deka ngalah ka tuchong,
Semadi nyau mai kelutong indu meriam.
Batu buku semambu ngandong,
Udah dibiau enggau selanjau manok tuntong,
Keba pun ibun pasun sengkilong tedong,
Nyelinting lemai niap peranama bulan kembong,
Sigi bemunyi kaong-kaong,
Ngua sengkilong ke salumpong tampong pesiran.
Nya ga sua Maga seduai Tutong enggau penchingan tunjok ujong,
Ngagai melanyi bujang lempong,
Dikena medong ngulih ka pegeri benda lempaong,
Bebulu gadong tutop enggau gong raban menangan.
Nya alai batu petakang bintang bekijap,
Batu tandang pinang sesirap,
Sama udah dikebau enggau selanjau manok kepiat.
Tu pan sua Lenta seduai Kumang Jinap,
Enggau penchingan tunjok empat,
Ngagai teruna dara nelap,
Ngambika landik ngebat,
Pandai nyikat pua ampang berinjan,
Tambah ga pandai amat ngaga surat,
Ngelala chap bansa Tuan.
Batu takang temiang ransa batu tanah nempala rata,
Nya ga sua Sempeta surong Simpulang Gana,
Enggau penchingan tunjok dua,
Dikena ngintu sempuli anyi padi puya,
Awakka sebaka tebal belayan,
Tambah ka pengerah mudah dikena ngulih ka reta,
Chukup bansa niap macham.
Batu bena gigi gumbang keruntok tandok genali ngerang,
Ulih sida liba aya jang,
Nyamah di ai perebeni bunga pasang,
Sama ketawa ransing senang,
Laban udah dibiau enggau selanjau manok labang.
Nya ga diberi Seragindi enjok Keling laki Kumang,
Ubat dikena ngulih ka perenchit ringgit mata wang,
Enggau dikena sida melanyi bujang mekang,
Berujan ke leka meriam ngelaban leka senapang,
Kenyau ari pagi nyentok ka petang,
Enda meh sida lesi bebadi laya tumbang,
Enggau orang mangkang batang titi rawan.
Nya alai keruntok tandok rusa gunja,
Taring uting babi menoa batu perigu saribu guna,
Sama ransing balat gaga,
Laban udah dibiau anak bujang lemambang kengkang laba,
Enggau selanjau manok banda,
Laban iya nya endang orang ke bisa di nyawa dabong lancham.
Nya alai udah bekau biau enggau selanjau manok biring,
Udah disua ka ja ading piring,
Tambah timang Puntang Medang seduai Apai Keling,
Samoa tandok raban taring bebali bisa ari ipoh kinying,
Ulih Luping ari bansa Kayan.
Udah bekau biau enggau selanjau kelabu beloh,
Udah diading ka piring mua pemaioh,
Tambah ditimang Bulan Menyimbang seduai Apai Segadoh Rioh,
Nya alai ubat raban pengaroh,
Bebali bisa ari ipoh lulap Memaloh Langai Buyan.
Ubat tuai udah ga abis rintai chukup raban,
Pengaroh lama udah ga ditaga ka ja piring penganan,
Pengaroh baru udah ga ditata darah manok sidu enselan dikena.
Ambong buah ambong rian,
Tuah kitai minta mudah lalu tambah jereki mimpi malam.
Udah bekau biau enggau selanjau ijau manok bekata tu ila,
Agi ga kitai bisi mimpi,
Leboh ke tindok di retok papan pelangka,
Bebungkur enggau langgur ampang mensuga,
Bepanggal betekal dada.
Dia lalu mimpi betemu enggau Biku Bunsu Petara,
Enggau aki Anda Mara,
Lalu nyua ka kitai batu bingka lia jera pating aur kira,
Diberi ngagai sida anembiak ke jejengkak benong reremba,
Ngasoh sida ransing ati mansang ka sekula,
Enda berasai tinda sida mujor peresa tangga sembilan.
Leboh kitai ke tindok di retok papan pengalai,
Bebungkur enggau langgur ampang belulai,
Bepanggal betekal gundai.
Dia lalu bemimpi betemu enggau Keling seduai Ngelai,
Lalu mai bejalai niki bukit ngulu sungai,
Lalu nyua ka keruntok tandok pelandok kirai,
Batu jematan tampong jalai,
Nya ga ubat besai enti sakit ngasoh gerai,
Ti seranta ngasoh bulih utai,
Sida ke nyadi kerani niki gaji besai,
Enti sekula ngasoh pandai.
Agi ga leboh tindok di retok papan disimpong,
Bebungkur enggau langgur ampang belumpong,
Malai rampang sinang bungai belitong.
Dia lalu bemimpi betemu enggau Jembu seduai Singalang Burong,
Dia dibai seduai berandau nyampau di itong,
Lalu nyua ka batu buku semambu ngandong,
Batu leka entaba chundong,
Sua iya di tapa ujong kudong,
Nya ka ubat ngambi ati kitai tau begempong,
Besabong sukong betulong pangan.
Nya alai pengaroh udah ga maioh nadai timpang,
Ubat endang udah sama genap bisi magang.
Ti gawa umai kitai tu nadai enggai,
Nurun tumu datai ka petang,
Gawa kebun endang tumu nurun ngelaban sebun ambun midang,
Sida ke gawa perintah beati balat chakah,
Ngator ubah ripih pemansang.
Bala anembiak sekula beati ransing gaga,
Laban tinda ngambu diri enggau orang ngator dunya bumi belinggang,
Bala soldadu dipuji lumor satu,
Ninting hari tiap minggu ngebu ka peluru leka senapang,
Ngabis ka komunis ari Sitak Kesatu,
Nyentok ka entigis langgai Limbang.
Nya alai Keling endang bedau ngembing sereta bejalai,
Selampetoh endang mengkang ngamboh,
Ngasoh tuboh kukoh sampai ka tuai,
Petara bedau ngemata Simpandai bedau ngimbai,
Tua enda ngelengka ngimbai kitai.
Nya alai gayu guru lantang senang,
Nadai apa nadai nama,
Kukoh tegoh samoa raban bansa Iban.
No comments:
Post a Comment