TINCHIN BELAH ROTAN

1. Tu ai teratak bintang banyak, 

Ninggang awak arus nanga. 

Tu ai gemuroh bintang laboh, 

Baka suloh lampu kelita. 

Tu ai kechapah batu blah, 

Panjah darah babi menoa.

 Di turun ka kami nyerumba sebun ambun nyaia, 

Di pelam kami enam malam di pelawan benda menaga, 

Dia iya lalu bebali nyadi bisa, 

Tak prabansang dalam balang butol segala.

 Nya alai ke lemai tu, Iya merenchit mimit ninggang chubit chawan bebunga,

 Engkah ka kami manah-manah di klasah tikai sana.

 Tu ga kena kitai begempuru bejako nanya ka berita, 

Tu ga kena aku ngasoh nuan nebah tatah dabong seleka enggi nuan aya, 

Ngasoh nuan dulu bejako inggar didinga,

 Nanya ka berita di moa bala pengabang.

 2. Pengari ari sepiak indu dulu bejako nanya ka berita ari pengabang lelaki: 

 Nya alai aku tu tak sangkal ke bejako ngagai kita.

 Laban aku nyau tepeda ka kita ke landai indu landak bebulu burak,

 Bekengkang punggang putting juring ngujong geraji,

 Aku tepeda ka kita tajak indu tajai belanggai panjai, 

Taja kepai-kepai ngambu diri terbai ka Brunei pulai hari. 

Aku tepeda ka kita bruang indu raak, 

Ganggam lengan ngerumpang batang tebelian. 

Nya alai lama kitai tu udah berimbai dudok besendi, 

Aku nyau deka nanya sapa kita ke kenyalang indu kenyali, 

Laban aku deka ngasoh kita ngelua ka sapi buah belili, 

Awak ka diambi sida teruna dara tinggi.

 Lagi iya tau bebali nyadi taring uting ngeli jani, 

Ka ubat kena kami ngambi sempeli, 

Kena kami ngisi igi tibang rarentan. 

 Sapa kita ke dikumbai orang kenyalang kenyali lelaki, 

Laban aku tu nyau deka ngasoh kita ngelua,

 Ka buah engkelili ditikai anyam diri. 

Lagi iya bebali nyadi ngeli jani babi lelaki,

 Diambi endu teruna dara mereti, 

Jadi ka ubat padi awak ka tebekan lalu jadian.

 Sapa kita ke dikumbai kenyalang kenyali banda,

 Laban aku deka ngasoh kita ngelua,

 Ka kembayau jera di tikai anyam dua, 

Diambi sida lengayan endun dara, 

Laban lagi iya tau bebali nyadi taring uting babi menoa, 

Jadi ka ubat padi paya kena ngisi moa tibang tundan.

 3. Nama ai ansah pengari ari pengabang lelaki ti nyaut madah ka pejalai diri: 

 Tu ai buah padi mudah, Baka buah jelai merundai.

 Nyadi tu ai ansah, Ukai baka ke ngansah beliong bisi predah, Ngansah rantong besi patah,

. Tu ga ai buah padi mudah, Disua ka aku enggau tapa tunjok tengah, 

Di kena aku nyiram simpan geman dabong tatah nuan aya/unggal. 

Tu kena aku ngasoh nuan dulu bejako, Ngara ka leka entelah, 

Laban nuan endang dipadu ka orang, Landik bungah bejako tuai.

 4. Saut pengari pengabang ari lelaki:

 Nyau kesal mimit meh aku, Udah diberi kita ai sempuli padi bukit, 

Ke udah diengkah ka kita dalam chawan indu chubit. 

Udah disua ka anak bujang lemambang entelit langit, Ngena tapa jari chawit.

 Ko iya ti meri ngagai aku, Ngasoh ati aku gaga be-ati gagit, 

Tang tu tak ngasoh kira aku nyaia mansang mit. 

Kada enda asai tu ati sida niang Aji menya, 

Leboh gasan nan di Krangan Sungai Langit.

 Ko iya deka ngaga kota kepit buloh temiang,

 Tang iya tekinsit mimit nyadi kemibit daun lalang. 

 Unggal/Aya, Kami tu meh dikumbai orang anak tengas,

 Ke jelas-jelas mudik batang ulu Ketunggau,

 Ngempas ka kaban di kranggan sandau miang,

 Napat ka riap tampun bubu. 

Kami tu meh ke dikumbai orang anak baya, 

Ke kaya-kaya mudik batang ulu Salimbau, 

Ke benyawa nukang ka raang, Mesai selambang moa pintu. 

Kami tu meh ka digelar orang anak kenyalang, 

Ngenggang di batang Ulu Julau, 

Napat ka kembayau mansau ngabu. 

 Aya/Unggal, Kami tu wuok empeliau arang, 

Masai berua di randau kubal tusu. 

Nya alai penatai kami tu bisi reti, Penemuai kami bisi utai ko-ati. 

 Nya alai nyerumba buli nyin kemari, 

Ke cheli-cheli tumboh lemai, Nyerumba sedan bulan mingkai, 

Kami bisi datai ditu, Nganjong tebinsu langgu buah binjai,

 Nya alai lalu diengkah ka kami manah-manah di kelasah tengah tikai, 

Enda dilengka ka kami sengapa pia sabarang alai. 

Disua ka kami ngagai kita,

 Leboh kitai ke kemumok dudok di ruai,

 Leboh kitai ke bepangkang ke pengedang baku Brunei,

 Serta disambut kita enggau kukut jari pamegai, 

Dikurong kita dalam pebenong tajau rawai, 

Dikerbat kita enggau kawat panjai tigai.

 Nyadi nya ko kitai suba jadi ka sengkeram jako semaia kitai.

 Nya ti ngasoh kami datai baka ka saharitu,

 Enggau anembiak, enggau ke tuai, Enggau sida ke mit, enggau sida ke besai, 

Mai bala nitih ka semia. Nya alai nyerumba buli ke cheli-cheli nyin kemari tumboh malam, 

Nyerumba senayah bulan keleman, 

Bisi kami udah datai ditu, Datai ari Batang Kerangan Pinggai tebing kanan,

 Nganjong tebinsu langgu buah kemantan,

 Ke lalu diterima kita enggau tapa jari ngengam, 

Disambut kita enggau kukut jari kanan. 

Dibungkus kita enggau saratus bali belantan, 

Ditaroh kita tegoh-tegoh dalam mandoh benda pelawan,

 Kerbat kita enggau kawat panjai enam, 

Dijereki kita enggau badi ilang kayan. 

 Nyadi nya ko kitai suba jadi ka geran jako sama. 

Nya alai baka ka saharitu kami datai ditu, 

Mai indu, mai kalu, Mai anembiak, mai redak, Mai gendang, mai sebang,

 Deka nentu ka enti utai nya amat, kami deka ninga,

 Enti utai nya tentu, kami deka nemu. 

 Nya alai ka saharitu kami tu dibai sida apai ( sanu ) seduai indai ( sanu ), 

Nginsit ka pintu langit rapit baka tambit terkura umang, 

Dibai sida ngansat ka pintu langit entap baka singkap krang kepayang. 

Enti nya amat rengut bunga buot ke bebau bali-ali,

 Enti nya amat aba bau bunga ke ngaba basari-sari. 

 Nya kabuah kami ke datai kitu, 

Laban dibai sida ke indu negu bintang buyu mesai jalu jalong jebong,

 Dibai sida ke dara ngemata ka bintang saleka mesai krang kepayang pabong, 

Dibai sida ke biak nyubak bintang banyak tumboh di kebong langit landong. 

Nya alai kami tu deka nyidi aba bau bunga ke ngaba satengah bulan.

 Kami tu deka nyium rengut bunga buot, 

Puput ka ribut angin selatan. 

 Nya alai kami nyau deka nyua ka tapa jari kanan,

 Ditampong enggau jari sukan,

 Jalai Renggan menya ngulih ka basiran bintang tekinsit.

 Kami nyau deka nyua ka tapa dada jari,

 Tampong enggau tangga Bejie, 

Nya ga jalai Bejie ngulih ka kunchi pintu langit. 

Laban kami nyau deka mindah ka genteran papan punggah, 

Penudok perampang bunga burah,

Ke berendah mansau jara, 

Ke berendah mansau tisi. 

Kami dibai orang negu genturan papan timpu, 

Penudok perampang bunga kapu,

 Ke besudu ular bisa, Ke besudu ular lidi.

 Kami deka nginsit ka genturan singit, 

Tambun berurah bunga bangkit, 

Ke begantong tengan menoa

, Ke begantong tengan ari. 

 Nya meh penatai, penemuai kami.

 Datai enggau antu enggau indu. 

Sama enggau anak enggau anembiak. 

Kami deka nentu ka utai nya amat, 

Kami deka ninga ka utai nya tentu. 

Kami deka nemu.

 5. Ai ansah orang ke nyaut ngari ka sepiak indu: 

 Tu kerbat pakau kawat, Baka jilap daun api.

 Ai teritis limau manis, Ke teruba nyadi brandy. 

Bai kami nurun nyerumba sebun ambun pagi, 

Di pelam kami enam bulan di pelawan benda guchi, 

Taroh kami tegoh-tegoh dalam mandoh benda menaga,

Dia iya bebali mansau jara, 

Dituang ka kami ngagai balang butol besegi. 

 Nya alai ka lemai tu Aya/Unggal, 

Tak perabansang pansut ari balang butol besegi. 

Di engkah ka kami ba klasah tengah tikai.

 Tu ga kena kami ngansah tatah dabong gigi enggi nuan, 

Ngambi ka nekis nyerais inggar bemunyi. 

 Kalia udah ga tu kena kami ngansah perapang pedang panjai,

 Enggi Antau Linggang Negeri seduai Gun Mangku Bumi, 

Katiga enggi Nanang seduai Ajie, 

Ti dikena sida bamok ngapus ka ari,

 Ngalah ka segi kota simbang. 

Pemulai tu sida iya gaga lantang ati, 

Lalu niri ka gawai igi balang.

 Nya alai tu ai tangkai lia kerapa,

 Ai pun tarum kemuja, 

Di engkah ka kami di klasah sana jawa,

 Di perambun ka endu endun nyerumba sebun ambun nyaia,

 Sataun mangun pun padi paya, 

Udah dipanjah sida dara bungah enggau darah babi menoa, 

Udah dikarong kami dalam benong benda menaga, 

Nya alai ka lemai tu, Merenchit mimit iya ari burit gelas kacha, 

Kena aku ngansah tatah dabong saleka, 

Enggi nuan aya/unggal. Udah ga tu dikena aku ngansah perapang pedang temaga, 

Enggi Garran seduai Mula, Enggi Ngumbang apai Lada seduai Bantin Apai Rengga, 

Udah nya kenu ko sida, Tajam ari mata simbang jerungkang,

 Laban tu udah dikena orang ke besai nampak nama jelai berita, 

Ngeruntoh ka kota Tuan Raja, Di nanga arong Skrang. Nya alai ka lemai tu aya, 

Dikena aku ngansah tatah dabong saleka enggi nuan,

 Ngambi ka nyawa nuan nekis nyaris inggar didinga, 

Disema ka aku ngagai panjong kapal johara, Enggi Ranee bini Sultan Tuan Raja, 

Mudik nanga Batang Simanggang. 

Agi ga aku nyema ka nyawa nuan, Samunyi enggau Radio, 

Di kena Koh apai Segura, Madah ka menoa dras mansang. 

 6. Udah badu ngirup pengari ari sepiak indu lalu bejako munyi tu: 

 Nyerumba sedan bulan pernama, 

Leboh aku tindok di retok papan pelangka, 

Gali galai di tikai sana jawa, 

Bebungkor enggau selanggor bali mensuga,

 Dia aku bisi mimpi. Mimpi asai ka betemu enggau Tutong seduai Laja, 

Datai ari menoa raya di nanga Panggau Dulang. 

Dia aku asai ka dibai seduai nyimpong, Ujong semambu ngandong, Sengkelong tedong ular naga. 

Mimpi asai ka dibai seduai nyubah, Bintang banyak mesai chapak jalong temaga,

 Laboh ka baroh nyadi pebenong benda menaga, Nadai utai ngemanah nya gaya,

 Dipeda baka gamal anak Dayak, Bemata baka gamal anak China,

 Baka ke tau diasoh nyadi tuai megai menoa, Ngadu ka uta wang timbang.

 Laban meda utai nyelai bakanya, Dia kami sarumah tak bela tekenyit, Tepeda ka pemanah benda menaga, Lalu dibiau kami enggau selanjau manok banda, 

Ading kami enggau piring chukop perengka, 

Laban asai ti nyambut penatai anak Petara, 

Nyambut antu bala pengabang. Nyerumba tinda sabong lemai,

 Nyerumba sedan bulan mingkai, 

Leboh aku tindok di retok papan lekai, 

Gali di linti lambar tikai, 

Bebungkor enggau selanggor bali belulai, 

Dia aku asai ka bisi mimpi. 

 Mimpi asai ka diasoh Sanggol Labong seduai Nawang Gundai,

 Datai ari menoa raya sida di nanga Gelong Merundai, 

Ke begamal baka guchai, Murai ka tangkai takang isang.

 Dia aku asai ka diasoh sida iya, Nyarau tandan tangkai ranyai, Ke merundai laboh begitang. 

Mimpi asai ka diasoh sida negu bintang buyu, Laboh mesai jalu jalong timang,

 Lalu laboh ngimbai ningka tajau lelayang. 

 Dia kami sarumah lalu tekenyit serta gaga, 

Tepeda ka anak gemala tekang gempanang,

 Dipeda baka ka tau nganchau tikai, 

Ngintu temuai mela pengabang. 

Samoa kami bela rindu serta enggau ati lantang,

 Biau kami enggau selanjau manok labang, 

Diading kami enggau pamping piring letup pulut jentawang, 

Asai ke nyambut penatai tuan Raja Tuai, 

Datai ari gilik tasik besai ledong lelinang. 

 Nya alai Unggal/Aya, Samoa utai ti ditanya ka nuan nya amat magang. 

Nya alai skali nyerumba sedan bulan nyin kemari, 

Sanu seduai sanu bisi datai nemuai ngagai kami kitu. 

Leboh nya semua jako sama agi rapas, 

Nya alai kami agi deka bejinak, Agi deka ngasoh semak. 

 Nya alai ngelamatu kami seruran nganti penatai kita, 

Tang nadai ga meda kita datai agi.

 Nya alai diatu tekang gempanang mau segala nadai agi ditu,

 Udah dikurong kami dalam pebenong benda menaga,

 Udah di jerai kami enggau duri besi kemuja,

 Udah dipelali kami enggau badi bemata changka, 

Di kunchi kami dalam peti menanyi ringkat dua, 

Udah kerebat kami enggau kawah panjai tiga. 

Kami deka muka enda ulih buka agi,

 Ka ditiki enda ulih tiki, 

Beduri ba badi mata changka. 

Ditebang enda ulih tebang,

 Bepuak ka belembang lampang besi. 

Ka ditunu enda ulih ditunu, 

Ai nyau ngeching mesai tangkong kendi temaga. 

Pun di ibun pasun diwan pesilar ular naga.

 Batang belit kendawang tedong bisa.

 Pun dan wan ranyuan madu banda. 

Puchok enda ulih di tutok enggau tirok sangkoh bemata dua, 

Wan kejatan burong tunggok,

Sikok-sikok nyabak ka rayok bulan pernama. 

 7. Pengari ari lelaki nyaut baru munyi tu: Unggal/Aya, 

Nya alai samoa utai ti ko nuan nya amat magang. 

Tang dalam pia, Kami nadai penakut, nadai penangi. 

Kami endang nyikap diri. Nya alai tipang pesilar ular beluai, 

Bisi dibai kami ditu, Diempu niang Minggat apai Runai,

 Leboh gumi ke pegi ngagai kerinchi pantai Panai, 

Parai sebrai tiban Nanga San. 

Enti tipang pesilar ular naga, Bisi ga dibai kami ditu. 

Dikena niang Rekaya Dana, 

Leboh lupu ngulu ka orang nyerang ngagai Batang Sungai Raya, 

Trus ngalah ka china nyentok ka nanga Batang Sengkawang. 

Enti tipang pesilar ular engkudu, Bisi dibai kami ditu,

 Olih niang Linggir Mali Lebu,

 Leboh lupu ke mupu anak iru bulih 41 ka Ulu Sugai Langkang.

 Tipang pesilar ular tedong bisi ga dibai kami ditu, 

Olih niang Tarang apai Dungkong, Leboh medong ngaram ka bangkong nanga Rajang. 

Tang tipang tu enda dikena kami agi, Laban iya udah enda bisa. 

 Tang nyerumbu randang bulan kembong tu kemari, Kami diasoh Sultan tuan Insong, 

Nanam nyatu getah nyelutong. 

Dia deh kami nemu pengaroh baru, Ke bisa ari gigi pesiri ular tedong.

 Enti di tikam, iya tau engkanjong, Enti di tegu, iya tau nyurong. 

Nya alai aya/unggal, Enda iboh kami ngasoh iya terebai, 

Semina ngansat ari kami ke besarok dudok berintai, 

Pintu kita lalu tekesai lalu tetukang.

 8. Ai ansah orang ke tau betusut ari spiak indu ti nyaut jako tu lalu ngara ka tusut orang ke jadi melaki-bini: Tu ai palepah apong nipah,

 Tumboh di tanah pala pantai. 

Tu ai batang bindang beduyah,

 Tanam Seripah Dayang Mai. 

Tu ai dan meranjang bulan,

 Tepan kaban burong Tunggok, 

Sikok-sikok nyabak ka rayong bulan pernama. 

 Kita ke tuai udah berintai besarok dudok.

 Nya alai aku ngelar kita ngagai bidok, 

Linggar kepar-kepar ngelayar lansar pala lubok.

 Leboh menoa kitai ke agi dipegai Menira Raja Brooke, 

Nadai ga aku ninga nuan sebana madah ka diri suntok.

 Enti temuai datai, nadai ga aku ninga nuan enggai mai temuai dudok. 

Laban nuan endang sidi di jari ujong tunjok, 

Teleba maras tulok moa pasu. 

 Tu meh ai ganja bisa teleba bemain di moa burit mangkok, 

Ai ganjai nyamai ngasoh grai angkat mabok, 

Sua ka aku enggau tapa ujong tunjok, 

Sambut nuan enggau tangkup dabong rasok.

 Tu ga kena kami ngasoh nuan muka randau kara, 

Ngusai ka randau rambai,

 Nyila lambar buok ke berasok pampang saribu.

 Tu ga kena nuan ngusai ka jala panjai,

 Ngambi ka ngerembai mungkor dunya,

 Kena nuan nesa penyauh sida, 

Kena ngusai ka penyauh kitai,

 Ka meda ka penyauh antara.

Dikena nuan ngempong daun apong,

 Diara ka di moa bala mensia,

 Kena tinda nuan ngara ka leka, 

Besebut ka rurun tusut.